Vidi fonton por 3-8. La rakonto de Nando la paŝtisto

　　Cxiuj eraroj venis el malbonaj mensoj

　　3-8. La rakonto de pasxtisto Nando

　　La malbona menso faras

　　Malbonon pli grandan

　　ol malamiko faras al sia malamiko

　　Aux malamanto al sia malamato.

　　Dum vizito al iu vilagxo en la regno de Kosalo, la Budho parolis tiun cxi verson rilate al pasxtisto Nando.

　　Nando estis pasxtisto, kiu prizorgis la bovojn de Anatapindiko. Kvankam li nur estis pasxtisto, li havis sian propran ricxajxon. Li fojfoje iris al la domo de Anatapindiko kaj tie vidis la Budhon kaj auxskultis lian predikadon de tempo al tempo. Nando petis, ke la Budho vizitu lian hejmon. Sed la Budho ne tuj akceptis la inviton, dirante, ke ankoraux ne estas la konvena tempo por la vizito.

　　Post iom da tempo, dum la Budho vojagxis kun siaj sekvantoj, li forlasis sian vojon por viziti Nandon cxar li sciis, ke venas la konvena tempo por Nando ricevi lian instruadon. Nando respektoplene akceptis la Budhon kaj liajn sekvantojn. Li servis ilin per lakto, laktaj produktajxoj kaj aliaj elektitaj mangxajxoj dum sep tagoj. En la lasta tago, post kiam Nando auxskultis la predikadon de la Budho, li atingis frukton de sotapato. Kiam la Budho forlasis tiutage, Nando sekvis lin por iom da distanco portante lian bovlon, kaj fine riverencis por adiauxi kaj ekiris al sia hejmo. 

　　Gxuste tiam sago elpafita de cxasisto hazarde trafis lin. Poste, la monahxoj sekvantaj la Budhon trovis, ke Nando kusxas morta. Ili raportis la okazajxon al la Budho, dirante: “Estimata Sinjoro, cxar vi venis cxi tien, Nando, kiu faris grandan oferadon al vi kaj akompanis vin sur via vojo, estis mortigita kiam li reiris al sia hejmo.” La Budho respondis al ili: “Monahxoj, cxu mi venis cxi tien aux ne, li ne povus eviti la morton pro sia antauxa karmo.”

　　Kiam bandito vidas alian, li tuj atakas tiun. En la sama maniero, kiam homo vidas sian malamikon, li ankaux faras malutilon. Sed la malbone funkcianta menso faras al sia posedanto pli grandan malbonon ol tion, kion faras bandito al la alia aux malamanto al la malamato.