Vidi fonton por 3-7. La rakonto de Tiso, la monaĥo kun fiodora korpo

　　Sen menso, la korpo estas senvalora

　　3-7. La rakonto de Tiso, la monahxo kun fiodora korpo

　　Estante sen konscio

　　Kusxos nia korpo

　　Sur la tero

　　Kiel senutila ligno.

　　Restante en la Gxetavana Monahxejo, la Budho parolis tiun cxi verson rilate al monahxo Tiso.

　　Lerninte meditan metodon de la Budho, monahxo Tiso diligente praktikis meditadon kiam li suferis de malsano. Malgrandaj furunkoj aperis sur lia tuta korpo kaj poste farigxis grandaj abscesoj. Kiam tiuj abscesoj rompigxis, liaj roboj supraj kaj malsupraj farigxis gluemaj kaj makulitaj de puso, kaj lia korpo eligis nauxzan fiodoron. Pro tio, oni nomis lin Pusigata Tiso aux Tiso kun fiodora korpo.

　　La Budho neniam ignoris esplori la mondon dufoje cxiutage. Je la tagigxo li esploris la mondon, rigardante de la mondlimo al sia parfuma cxambro. Tiam estimata Pusigata Tiso aperis en la rigardo de la Budho.

　　Sciante, ke la monahxo Tiso jam maturigxis por arahantigxo, la Budho pensis: "Tiu monahxo jam neglektigxis de siaj kunuloj kaj li havas neniun alian rifugxon ol min en la nuna tempo." Do la Budho forlasis sian parfuman cxambron, sin sxajnigis rondiri en la monahxejo kaj iris gxis la halo, kie konservigxis fajro. Li lavis akvoboligilon, metis gxin sur la fornon kaj atendis boligxon de la akvo en la cxambro kun fajro. Kiam li sciis, ke la akvo jam varmigxis, li iris al la lito, sur kiu kusxis la monahxo, kaj tenis la litrandon.

　　Gxuste tiam monahxoj diris al la Budho: "Bonvolu lasi gxin, Sinjoro. Ni elportos lin por vi." Dirinte, ili portis la liton kaj Tison en la cxambron kun fajro. La Budho ordonis, ke la monahxoj demetu la supran vestajxon de Tiso, lavu gxin en varma akvo kaj metu gxin en la suno por sekigxi. Poste li iris al la lito, staris cxe Tiso, malsekigis lian korpon per varma akvo kaj banis lin.

　　La supra vestajxo de Tiso sekigxis post lia banigxo. La Budho ordonis vesti lin per la supra vestajxo, lavi lian malsupran vestajxon en varma akvo kaj meti gxin en la suno por sekigxi. Post kiam Tiso surhavis sian malsupran vestajxon, li kusxis sur la lito kun korpo refresxigxinta kaj menso kvieta. La Budho staris cxe lia kapkuseno kaj diris al li: "Monahxo, via konscio forlasos vin, kaj via korpo farigxos senutila kiel ligno kusxanta sur la tero." Je la fino de la budha instruo, monahxo Tiso atingis arahantecon kune kun analitika rigardo kaj baldaux forpasis.

　　Lia senkonscia korpo restis sur la tero kiel putrinta senutila ligno.