Vidi fonton por 3-2. La rakonto de iu monaĥo

　　Detenita menso kondukas al felicxo

　　3-2. La rakonto de iu monahxo

　　La menso estas rapida kaj malfacile enketebla

　　Gxi falas sur ion ajn laux sia volo.

　　La trejnado de menso estas bona,

　　La trejnita menso alportas felicxon.

　　Dum sia restado en la Gxetavana Monahxejo, la Budho parolis tiun verson rilate al iu monahxo.

　　Foje, sesdek monahxoj lernis meditan metodon de la Budho, iris al Matika vilagxo cxe montpiedo. Tie, Matikamata, la patrino de la vilagxestro oferis al ili mangxajxon. Sxi ankaux konstruis monahxejon, por ke ili restu en la vilagxo dum la pluva sezono. Iutage, sxi petis grupon de monahxoj instrui al sxi praktikadon de meditado. Ili instruis al sxi la metodon mediti pri tridek du konsistoj de la korpo kondukantan al atentemo de la korpaj kadukigxo kaj pereigxo. Matikamata praktikis diligente kaj atingis tri fruktojn kune kun analitika enrigardo kaj supernaturaj povoj ecx antaux ol faris la monahxoj.

　　Spertinte la gxojon pro la fruktoj, sxi rigardis per sia magia vido kaj trovis, ke la monahxoj ankoraux ne atingis sukceson. Sxi ankaux sciis, ke tiuj monahxoj havas suficxe da potenco por atingi arahantecon, sed ili bezonas tauxgan mangxajxon. Sxi do pretigis bonan kaj elektitan mangxajxon por ili. Per la konvena mangxajxo kaj gxusta klopodo la monahxoj progresis en la gxusta koncentrado kaj finfine atingis arahantecon.

　　En la fino de la pluva sezono, la monahxoj revenis al la Gxetavana Monahxejo, kie la Budho restis. Ili raportis al la Budho, ke cxiuj el ili fartas bone kaj vivas en komforta cirkonstanco, kaj ke ili ne bezonas pensi pri la mangxajxo. Ili ankaux menciis pri Matikamata, kiu sciis pri ilia penso kaj preparis kaj oferis al ili la mangxajxon deziratan de ili.

　　Auxdinte ilian parolon pri Matikamata, iu monahxo decidis ankaux iri al la vilagxo. Do lerninte meditan metodon de la Budho li atingis la vilagxan monahxejon. Li trovis, ke cxion deziratan de li alsendas Matikamata, la discxiplino. Kiam li deziris, ke sxi venu, sxi mem venis al la monahxejo portante elektitan mangxajxon. Mangxinte, li demandis al sxi, cxu sxi scias la pensojn de aliaj homoj, sed sxi evitis lian demandon kaj respondis: “En iuj metodoj homoj povas legi la penson de aliaj.” La monahxo pensis: “Se mi, ordinara mondano, havas iun ajn malpuran penson, sxi certe eltrovos.” Li do ektimis la maljunan budhaninon kaj decidis reveni al la Gxetavana Monahxejo. Li diris al la Budho, ke li ne povis resti en Matika Vilagxo cxar li timis, ke la discxiplino malkasxos la malpurajn pensojn en li. La Budho do instruis al li observi nur unu aferon, kiu estis atenti pri sia menso. La Budho ankaux proponis al la monahxo reveni al Matika Vilagxa monahxejo, kaj ne pensi aliajn aferojn krom la objekton de lia meditado. La monahxo revenis. La budhanino oferis al li bonan mangxajxon kiel sxi faris al aliaj monahxoj antauxe por ke li lauxeble praktiku meditadon sen maltrankvilo. Li ankaux atingis arahantecon en mallonga tempo.

　　La menso estas tre subtila kaj malfacila por vidi. Gxi alkrocxigxas al kiu ajn celo laux sia deziro. La sagxa homo gardas la menson, kaj la gardita menso alportas felicxon.