14. Mortigo al vojgvidisto
14. Mortigo al vojgvidisto
Antaŭe komercistoj deziris iri al la maro, sed ili bezonis iun por gvidi la vojon. Fine ili trovis vojgvidiston post kiam ili serĉis kune.
Dunginte la gvidiston, ili kune ekvojaĝis sekvante lin. Kiam ili atingis dezerton, ili renkontis templon kaj devis oferi homon al la ĉiela dio por preterpasi.
La komercistoj interkonsiliĝis: “Ĉiuj kunuloj estas niaj parencoj, do kiel ni povus mortigi ilin? Nur la vojgvidisto konvenas por oferi al la dio.” Do ili mortigis la vojgvidiston kaj oferis lin al la dio.
Post la oferado al la ĉiela dio, ili perdis la vojon. Neniu sciis kien iri, do ili ĉiuj mortis pro malsato kaj laceco.
Ĉiuj homoj en la mondo kondutas simile. Se ili deziras iri al la darma maro por havigi al si trezorojn, ili devas havi la bonan konduton kiel sian gvidon. Se ili kontraŭas al la bona konduto, ili neniam povas trapasi la dezerton de metempsikozo. Ili suferas eterne en la vivoj de tri malsuperaj ekzistecoj. Ili similas al la komercistoj, kiuj deziris iri al la maro, sed mortigis la vojgvidiston, kaj sekve de tio, mortis mizere pro perdo de vojo.
